بسم الله الرحمن الرحيم
نفتتح هذا القاء مع الشيخ فهد بن غانم الخرفاني الدوسري بمحله العامر بمدينه الرياض وباسم شبكة قبيلة الدواسر التوثيقيه الرسميه اداره واعضاء نشكرك يبو محمد على اللقاء وكرم الضيافه
ابومحمد: يامرحبايبوعبدالله الله يحييك انت وهل المنتدي المحل محلكم يامرحبا |
ومسهلا |
القطامي: ابومحمدالمراقب ناصرالمسعري يسئل متي اهتويت الطير وصقرته
ابومحمد: والله ياطويل العمرمن يوم خلقناالله وانانحب الطير وشوفه أمابداية صقارتي سنة 1390هجريه شريت طير ذيك السنه وقنصت ووفقنا الله بالصيد ووقتها الصيد واجد الله الله |
القطامي: ابومحمد سؤال من مبارك الرجباني هل الطير يشرب الماء وكيف يتنفس
ابومحمد: الله الله الطير يشرب الماء ووقت الربطه نحط حوله ماء في ماعون |
القطامي:ابومحمد سؤال عن اهم المشاكل اللي تواجه الصقار
ابومحمد:والله ياطويل العمر اول ماعندنا مشاكل الصيد واجدوالطيور واجد اول يبوعبدالله الصقاقير يعطون الصقاره حقهاوسلومهااللي يعرفونها العرب والصقاقير اللي عليهم الكلام يعطون الطير حقه والمقناص حقه اما هالحين مشكلتنا من جداد الصقاره اللي لاسمعوك بالجهاز ودرو ان عندك حبارا تجمعو عليك من كل جهه كذالك قلة الصيد
وصيد الساحل |
القطامي:سوال من كبير العمامه عن اشهر الصقارين
ابومحمد: والله اعتذر عن الاجابه لانهم واجد ولاودنا نذكر احد وننسى احد |
القطامي:دغش ابن سيف الدوسري يسئل عن مواصفات الطير الطيب
ابومحمد:والله المواصفات واجد منها ان يكون الطير هجروعريض ووسرته طيبه وصده بارز جنحانه تكون متفهقه ومنها يكون عاري من الريش ارضيته وافيه الراس كنه زبيديه العين ماتكون بارزه الاوصاف واجد والطير لازان فعله هواهم شي |
القطامي: الشمالي يسئل عن سبب ضياع الطير وعن كيف يعرف الطير هل هو مدرب ولا وحش
ابومحمد:والله اسباب ضياع الطير واجدمنها هدت الطير بارض وعر ويروح ورى حباراه ويغتبي من شوفك ولاهده الطيروالليل ضاوي ولاوقت حومة الطيراو يكون فيه هواء صلف او عج وبعض الاوقات يتنكر الطير على صقاره اماالطير الوحش تفرقه عن البيتي او المدرب بلون الريشه لون الوحش ريشته صافيه وقرنا الهواء يفرق بالريشه وتلاحض فيه الوحوشيه لاخذيت برقعه اماالمدرب تعرفه من تشوفه من ريشته ولاخذيته وكشفت عنه راكد وينقز على وكره ويتجاوب معك اكثر من الوحش الله الله |
القطامي: سؤال من الشمالي عن اشهر سوق لطيور بالخليج
ابومحمد: والله ياطويل العمراول كان سوق الصبح عند امارة الرياض وسوق العصربسوق النهضه بيت شعر يجتمعون فيه الصقاقير هاذا شاري وهاذا بايع اماوقتنا الحالي صار هنامن الصقاقير وتجار الطيور من يحط له استراحه ويبيعون ويشترون فيها والطير اما اسواق الخليج هناك سوق الامارات لوني ماجيته |
القطامي: سؤال عن الخرب يبو محمد وطمل الحبارى للطير
ابومحمد: والله الخرب كل الطيور تصيده حر ولا شيهانه ولاوكري لله وفقها حولت به والحباري سلاحها لالحقها الطير تمرش عليه وهي ماده لزجه وريحتهاعفنه تطمل به الطير عقبها يطرح الطير ويوقع والحبارى تسلم |
القطامي:ابومحمدهجره الطيور متي تبداء وش اول مايجي منها
ابومحمد: والله لها حسبه معينه اول الوسم بعد النزل والحماموالكراوين والسماني البريه تشوف للطير واولها الشياهين |
القطامي: ابومحمد اماكن عبورها
ابومحمد: والله عندك الحمادشمال ومجيرمه والساحل الشرقي |
القطامي: الاماكناللي تحب تقنص فيها ابومحمد
ابومحد: والله اول اقنص هريسان لانه قريب وتالي اقنص شمال او الصمان |
القطامي:ابومحمد القصاره والصيد اول والمقانيص
ابومحمد: اول راعي الصيد على ذلوله او رجلي وطيره معه والسلوقي
لالقاله صيده هد عليها الطير والسلوقي معه ينفجها له ويحاوشه والصقاقير اول يكتفون الطير بكل جناح ريشتين او ثلاث يذلون عليه من الضياع ان صاد صيدته قريب ولا لينه مايضيع وراها |
القطامي:ابومحمد اغلي طير من طيورك
ابومحمد: والله الطيور كلهاعندي غاليه ولاكن اغلاهاطير جايني هديه من واحدا من عيالي وهو عبدالله ابن مدعث واغلي الطير من غلاء راعيه |
القطامي: ابو محمد غدى عليك اطيور
ابومحمد: ايوالله غدالي اربعه طيوروكلها ورى حباري |
القطامي:ابومحمدموقف بالمقناص تذكره
ابومحمد:سنه من السنين ونا قانصين ضاع لنا طيروحنا يم مشذوبه علوى من الحفرودورناه ولالقيناه وعقبها واصلنا مقناصناويوم جاء رابع يوم من ضياعه وحنانعشي حول ساموده وندعي طيورنا والله ماخذينا الاهوجاينا على دعو الطير وحنا نقضبه |
القطامي: ابومحمد الامراض اللي تصيب الطيور
ابومحمد: الامراض واجد منهاالقلاع والسده والنهته والرداد والنهته مالها علاج |
بهاذا نصل وياكم لنهاية الجزء الاول من مقابلة ضيفنا العزيز ابومحمد وترقبونا مع الجزء الثاني بحول الله
الإهداءات
10-03-2007, 02:20 AM
لقاء مع الصقارالشهير الشيخ فهد بن غانم الخرفاني الدوسري 
